Општина Кисела Вода објави јавен оглас за избор на ученици кои ќе посетуваат бесплатен летен спортско-едукативен камп. Право на учество имаат сите редовни ученици од општинските основни училишта на оваа територија, а огласот е наменет за талентирани спортисти, како и за ученици од социјално ранливи семејства.
Што се однесува до спортските таленти, право да аплицираат имаат учениците кои освоиле награди во олимписки или неолимписки спортови на општински, државни, регионални и меѓународни натпреварувања, во поединечна или екипна конкуренција.
Истовремено, огласот ги опфаќа и учениците од семејства во социјален ризик, примателите на социјална помош, децата на самохрани родители, децата од најмалку четиричлено семејство со само еден вработен на минимална плата, како и учениците од семејства чиј вкупен месечен приход не надминува 35.000 денари.
Паралелно со ова, во тек се и огласите за доделување на награди од страна на Општина Кисела Вода за талентирани основци кои постигнале врвни резултати во областа на науката и спортот.
Потребните документи за аплицирање можат да се преземат од официјалната веб-страница на Општина Кисела Вода. Кон нив задолжително се приложува и соодветната документација за докажување на спортските или научните успеси, односно социјалниот и финансискиот статус. Критериумите и условите за аплицирање за овие повици се достапни на следните линкови:
https://opstinakiselavoda.gov.mk/wp-content/uploads/2026/06/Letenkamp.pdf
https://opstinakiselavoda.gov.mk/wp-content/uploads/2026/06/Oglastalent.pdf
https://opstinakiselavoda.gov.mk/wp-content/uploads/2026/06/Oglassport.pdf
Рокот за пријавување за сите споменати огласи е до 13 јуни. Документите се доставуваат лично во архивата на Општина Кисела Вода или по пошта, на адреса ул. „Петар Дељан“ бр. 17, со назнака за кој оглас се однесуваат.
За сите дополнителни информации, лице за контакт за огласите е Сашка Аџулеска на телефонскиот број 076 495 042.