Општина Центар објави Јавен повик за организација на предучилишен музички настан – детски фестивал „Детелинка“, соопштија утрово од локалната самоуправа.
Станува збор за прв ваков фестивал, кој има за цел да го развива интересот и љубовта кон музиката кај најмладите, да ги открие новите таленти и афинитети на децата, како и да ја промовира креативноста на воспитниот и стручниот кадар во градинките. Настанот ќе се одвива преку јавна презентација на оригинални детски песни, создадени од вработените во предучилишните установи, посочи градоначалникот на Општина Центар, Горан Герасимовски.
Од локалната самоуправа објаснија дека избраниот организатор ќе биде задолжен за целосна реализација на фестивалот. Тоа вклучува изработка на јасно дефинирана агенда и сценарио, програма со оригинални песни на децата, музичка и сценска поддршка за нивната изведба, ангажман на водител со искуство во детски и културни настани, логистика за учесниците, придружни активности за најмладите, како и подготовка на промотивни материјали за јавна видливост на настанот.
Фестивалот е закажан за 18 мај 2026 година и ќе се одржи во „Паркот на франкофонијата“. Рокот за поднесување на пријавите е пет дена од објавувањето на јавниот повик на веб-страницата на Општина Центар.
Повеќе информации за фестивалот и начинот на пријавување се достапни на официјалната веб-страница на Општина Центар.