Општина Аеродром, во соработка со компанијата ЕКОТИП, воведе современа Tersano SAO® технологија за чистење, дезинфекција и дезодорирање во сите објекти на детската градинка „Буба Мара“, со што се поставуваат нови стандарди за хигиена, безбедност и грижа за здравјето на децата.
Денеска градоначалникот на Општина Аеродром, Дејан Митески, заменик-министерот за социјална политика, демографија и млади, Ѓоко Велковски и комерцијалната директорка на ЕКОТИП, Ина Милошевска, извршија увид во функционирањето на новата технологија што веќе се применува во повеќе објекти на територијата на општината.
Станува збор за иновативен и еколошки систем кој преку стабилизирана озонска технологија создава средство за чистење и дезинфекција без употреба на агресивни и штетни хемикалии. Овој систем овозможува ефикасно уништување на 99,9% од бактериите, вирусите и други патогени микроорганизми, а притоа е безбеден за секојдневна употреба во простории каде што престојуваат децата.
Општина Аеродром и во иднина продолжува со имплементација на современи практики и технологии кои обезбедуваат поквалитетни услови за децата и повисоки стандарди во јавните установи.