Претседателот на Социјалдемократската младина на Македонија (СДММ), Петар Огњеновиќ, на денешната прес-конференција упати остри критики до извршната власт, оценувајќи дека по две години од владеењето на премиерот Христијан Мицкоски и ВМРО-ДПМНЕ, младите луѓе во земјава изгубиле години и надеж.
Според подмладокот на опозицијата, владејачката партија во предизборната „Платформа 1198“ ветувала намалување на иселувањето, повисок животен стандард, задржување на младите во државата и отворање на 70.000 нови работни места. Огњеновиќ нагласи дека биле ветени и конкретни мерки за поддршка во образованието, домувањето и претприемништвото, но дека по две години ништо од тоа не е реализирано.
Од СДММ обвинуваат дека со блокирањето на европскиот пат на државата, на младата популација и се скратени перспективите, што резултира со зголемено разочарување, неизвесност и изолација. Како директна последица на ваквите политики, опозицијата посочува дека денес секој трет млад човек размислува да ја напушти државата, не поради тоа што не ја сака Македонија, туку затоа што нема доверба во актуелната власт.
Лидерот на СДММ во своето излагање додаде и дека премиерот прво упатувал јавни повици за враќање на младите луѓе во татковината, за веднаш потоа да најави нивна замена со таканаречени „економски работници“. Прес-конференцијата беше заокружена со став дека изборната програма на ВМРО-ДПМНЕ во реалноста донела само разочарување за младите граѓани.