Министерството за внатрешни работи (МВР) од следниот месец ќе започне со примена на брзи тестови за откривање присуство на наркотични средства кај возачите за време на сообраќајните контроли.
Според информациите објавени во медиумите, полициските службеници на терен ќе можат веднаш да направат проверка кај возачи кај кои ќе има сомнеж дека управуваат под дејство на дрога. Со земање брис од плунка, резултатот ќе биде достапен за три до десет минути.
Имено, Министерството веќе набавило првична количина од 10.000 тестови, кои се очекува да пристигнат во почетокот на август.
Еден тест чини 218 денари, а набавката е дел од двегодишна рамковна спогодба со максимална вредност до 80.000 евра.
Според бјавените податоци, тестовите имаат точност од 99 проценти и можат да ги користат полициски службеници без посебно медицинско знаење.
Со еден примерок од плунка ќе може да се провери присуство на седум видови психоактивни супстанции, меѓу кои кокаин, амфетамин, метамфетамин, опијати (морфин и хероин), екстази, седативи и ТХЦ – активната состојка на марихуаната.
Со новата мерка, полицијата ќе може побрзо да утврди дали возачите се под дејство на дрога, уште на самото место на контролата, без долго чекање за првични резултати.