Од денеска (1 март) граѓаните кои користат платежни картички за онлајн купување ќе се соочат со нови правила. Наместо досегашната потврда со СМС-код, стапува во сила законската обврска за засилена автентикација, која бара секоја трансакција да биде одобрена преку мобилната банкарска апликација.
„Корисниците на платежни картички ќе добиваат известување преку мобилната банкарска апликација и ќе треба да ја одобрат трансакцијата. Потврдата се врши со ПИН за апликацијата, отпечаток од прст или препознавање лице“, појаснуваат од финансиските институции.
Оваа промена е клучна за спречување на злоупотреби. Дури и ако некој ги поседува податоците од вашата картичка, плаќањето нема да може да се изврши без вашата лична потврда преку мобилниот уред. Целта е максимална заштита на средствата на граѓаните и компаниите преку дополнителни сигурносни проверки.