Новоизбраниот дописен член на Македонската академија на науките и уметностите, проф. д-р Мирко Тодоровски, ќе одржи пристапно предавање на тема „Електроенергетски системи во ера на енергетска транзиција – очекувани предизвици“.
Тодоровски беше избран за дописен член на МАНУ на Изборното собрание одржано на 7 ноември 2025 година.
Неговата професионална кариера во изминатите 20 години е поврзана со Факултетот за електротехника и информациски технологии (ФЕИТ).
Тој има значајни научни и стручни достигнувања во областа на електроенергетските мрежи, со особен фокус на нивното моделирање и развојот на методи за решавање на различни режими на работа на мрежите.
Научната и стручната работа на Тодоровски е потврдена со публикации во реномирани меѓународни научни списанија, соработка со електроенергетски компании и институции, како и учество и раководење со бројни истражувачки и апликативни проекти.
Има објавено 31 научен труд во реномирани списанија од областа на електроенергетиката со висок фактор на влијание, од кои 16 се објавени во списанија на IEEE. За својата научна продукција ја добил наградата за најдобар научник на Универзитетот „Св. Кирил и Методиј“ во Скопје.
Тодоровски раководел или учествувал во 15 научноистражувачки проекти финансирани од странски фондови, како и во 13 студии чии резултати имаат директна примена во електроенергетскиот сектор.
Неговата работа, како што е наведено во биографијата, придонесува и за зајакнување на соработката меѓу научната заедница и индустријата. Тројца негови докторанди веќе се афирмирани истражувачи и професори на домашни универзитети.