Премиерот Христијан Мицкоски, во гостувањето во емисијата „Под лупа“ на ТВ „Алфа“, говорејќи за владините инвестиции и критиките од опозицијата, ја обвини СДСМ дека шири, како што рече, невистини и се спротивставува на отворањето рудници.
Мицкоски порача дека наместо да се критикуваат проектите, треба да се слушне мислењето на граѓаните од Крива Паланка, како и на локалната власт.
„Ќе си измислат тема – овие се за податочен центар, ќе ни ја земат водата, струјата… Луѓето коишто ја разбираат оваа проблематика се смеат. Си измислија тема за антимонот. Појдете во Крива Паланка и прашајте ги луѓето“, рече Мицкоски.
Тој посочи дека Крива Паланка е рударски крај и дека таму се наоѓа рудникот „Тораница“, за кој рече дека сега е ставен во функција.
Премиерот додаде дека градоначалникот на Крива Паланка го контактирал со барање за помош околу решавањето на проблемот, бидејќи, како што наведе, без егзистенција би можеле да останат стотици или илјадници семејства, што дополнително би ја зголемило миграцијата од градот.
Мицкоски оцени дека Владата треба да продолжи со реализација на својата програма и проекти, додека граѓаните на избори ќе имаат можност да го дадат својот став.
„Што и да правиме, тие ќе си ја кажуваат својата лага, својата измислица – живеат во тој паралелен свет. Тие своето, ние своето. На крајот од денот ќе има избори, па граѓаните ќе одлучат“, рече премиерот.