Кина од 1 септември воведува нови правила за индустријата на инфлуенсери, со кои ќе се забрануваат лажни лајкови и следбеници, поттикнување омраза, експлоатација на малолетници и други злоупотреби на социјалните мрежи.
Иако регулативата често се нарекува „закон за инфлуенсери“, таа првенствено се однесува на таканаречените MCN агенции – компании кои управуваат со инфлуенсери и ја дистрибуираат нивната содржина на платформи како Douyin, Xiaohongshu и Bilibili.
Наместо надлежните да ги санкционираат само поединечните креатори, одговорност ќе имаат и агенциите што стојат зад нив. Сите нерегистрирани агенции ќе мора да се регистрираат кај кинеската Администрација за сајбер простор, а веќе регистрираните ќе имаат рок од 30 дена да ги усогласат своите активности со новите правила.
Забрането ќе биде поттикнување омраза и регионална дискриминација, величење криминал и катастрофи, организирање или поттикнување онлајн насилство меѓу врсници, како и користење малолетници и лица со попреченост за профит.
Регулативата директно се насочува и кон манипулациите со популарноста на интернет – лажирање прегледи, лајкови, следбеници и оценки.
Агенциите ќе мора да имаат одговорно лице и тим за надзор на содржините, а во договорите со инфлуенсерите јасно да биде утврдена одговорноста за објавените информации. Ако некој креатор ги прекрши законите или правилата на платформата, агенцијата ќе мора веднаш да ја суспендира или прекине соработката со него и да ја извести платформата.
Посебни правила се предвидени за малолетниците, вклучително проверка на возраста и согласност од родител или старател. Построг надзор ќе има и врз продажбата преку преноси во живо, каде агенциите ќе мора претходно да ги проверуваат производите и содржината што се промовира.
Прописот беше усвоен на 29 мај годинава од пет кинески државни институции предводени од Администрацијата за сајбер простор, а од утре почнува неговата примена.