Регулаторната комисија за енергетика (РКЕ) денеска треба да ја донесе новата одлука за цените на нафтените деривати. Како најреално сценарио се очекува ново поскапување на дизелот, додека раст на цените кај бензините ќе биде значајно помал.
И покрај тоа што суровата нафта во втората половина од неделата бележеше пад и Брентот од над 108 се спушти кон 104 долари за барел, цените на рафинираните горива, според кои РКЕ ја прави пресметката, останаа високи.
Најголем притисок е забележан кај дизелот. Индикативните медитерански котации за 10 ppm дизел во изминатите пет работни дена во просек се околу 1.595 долари за тон, што претставува приближно 6,8 проценти повеќе од претходната недела. Дополнителен притисок создава и американскиот долар, кој во однос на денарот неделава во просек е посилен за близу еден процент.
Состојбата со бензините е многу помирна, со просечна цена повисока за околу еден процент на медитеранскиот пазар, што остава простор за поскапување, но значително помало во споредба со дизелот.
Ценовниот удар и овој пат ќе биде ублажен со постојните владини мерки. За дизелот во пресметката останува намаленото ДДВ од 10 проценти и пониската акциза за четири денари, додека кај бензините акцизата е намалена за два денари за литар. Конечната пресметка РКЕ ќе ја направи врз основа на официјалните Platts котации и средниот курс на доларот.