Бирото за развој на образованието, во соработка со Министерството за образование и наука, ја објави Предлог-концепцијата за откривање и работа со талентирани и надарени ученици во основното образование.
Од БРО и МОН ги повикуваат сите заинтересирани да се вклучат во онлајн јавната расправа и до 10 октомври 2026 година да достават мислења, забелешки и предлози за унапредување на документот.
Од МОН информираат дека предлог-концепцијата е изработена согласно член 34 од Законот за основното образование, кој предвидува донесување документ со кој се уредуваат препознавањето и идентификацијата на талентираните и надарените ученици, како и мерките и активностите за работа со нив.
Според МОН, целта е да се воспостави поврзан и достапен систем за навремено препознавање и развивање на потенцијалите на учениците, нивна стручна идентификација и обезбедување соодветна воспитно-образовна поддршка.
Концепцијата дава насоки за работата на училиштата, соработката со семејствата и стручните институции, распределбата на одговорностите и следењето на квалитетот на поддршката.
Во јавната расправа се повикуваат да учествуваат наставници, стручни соработници, директори на училишта, високообразовни и научни установи, стручни здруженија, родители и старатели, ученици и сите други заинтересирани.
Мислењата, забелешките и предлозите може да се достават до 10 октомври 2026 година на електронската адреса javnarasprava@bro.gov.mk, со назнака „Јавна расправа – Концепција за талентирани и надарени ученици“.
Од БРО посочуваат дека доставените предлози ќе бидат разгледани при подготовката на конечниот текст на Концепцијата.