Соединетите Американски Држави ќе добијат поголем пристап за воени цели во Гренланд и ќе можат да воспостават нови одбранбени области, согласно договорот што денеска го потпишаа САД, Данска и Гренланд.
Договорот, потпишан на маргините на Генералното собрание на Обединетите нации во Њујорк, го изменува и дополнува Договорот за одбрана на Гренланд од 1951 година и нема рок на истекување.
Во документот, објавен од данското Министерство за надворешни работи, се наведува дека страните имаат заеднички интерес американската војска да има пристап до Гренланд во мера неопходна за одбрана на Гренланд, областа на Северноатлантскиот договор и американскиот континент, вклучително и преку воспоставување на одбранбениот систем „Golden Dome“.
Договорот предвидува зајакнување на ангажманот на НАТО на Арктикот, вклучително и во планирањето, присуството, вежбите и заедничкото собирање разузнавачки информации. На САД ќе им биде дозволено да ги модернизираат и прошират своите активности во вселенската база Питуфик, како и да воспостават дополнителни одбранбени области во Нарсарсуак и Местервиг, при што техничките детали дополнително ќе се усогласуваат.
Дополнително, Вашингтон може да предложи и други одбранбени области или зајакнување на воените операции и објекти, што ќе биде предмет на дополнителни консултации и меѓусебен договор меѓу страните.
Во документот е предвидено американските договори за стоки и услуги поврзани со воспоставувањето, одржувањето и сервисирањето на одбранбените области, колку што е можно повеќе, да им се доделуваат на компании од Гренланд, земајќи ги предвид нивните капацитети и изводливоста на работите.
Со договорот им се дава на американските сили право на слободен пристап и движење меѓу одбранбените области низ Гренланд по копно, воздух и море. Американските авиони ќе можат да летаат над и да слетуваат каде било во Гренланд, додека американските јавни пловила ќе имаат пристап под морето до неговите територијални води, освен ако страните поинаку не се договорат. Во документот се нагласува дека овие права мора да се применуваат на начин што го почитува гренландското општество и гренландскиот начин на живот, вклучително ловот, риболовот и другите традиционални активности.
Страните се согласија и заеднички да работат на спротивставување на шпионажата во Гренланд, додека Данска се обврза да продолжи да ја зајакнува својата безбедносна позиција на Арктикот.
Според договорот, ниту една држава што не е членка на НАТО не може да воспостави сопствени воени инсталации или да одржува трајно воено присуство во Гренланд. Документот го ограничува и стекнувањето контрола или значително влијание од страна на држави или инвеститори од земји надвор од НАТО, партнерските земји на НАТО и ЕУ во чувствителни сектори каде што тоа би можело да ја загрози националната безбедност или јавниот ред, како што се критичната инфраструктура и експлоатацијата на природните ресурси.
Иако американскиот претседател Доналд Трамп пред потпишувањето изјави дека договорот им дава на САД „трајна контрола врз безбедноста и сите други потреби“ во Гренланд, со документот се потврдуваат сувереноста и територијалниот интегритет на Кралството Данска и се признава правото на народот на Гренланд на самоопределување согласно меѓународното право.
Доколку Гренланд стане независен, Данска и Гренланд треба да обезбедат новата држава да се согласи да остане во НАТО, односно, доколку е потребно, да поднесе барање за членство, како и да ги преземе правата и обврските на Данска од договорот и одбранбените аранжмани.
Договорот ќе стапи во сила откако Данска и Гренланд ќе ги завршат соодветните парламентарните процедури.