Се уште без договор: ВМРО-ДПМНЕ на избори ќе оди ако 14 дена по ред бројката на новозаразени биде под 10
Утре завршува вонредната состојба, а позициите на СДСМ и на ВМРО-ДПМНЕ во однос на датумот за избори и натаму се далеку. Од „МКД.мк„ пишуваат дека за ова прашање телефонски разговарале и Зоран Заев, претседателот на СДСМ, и Христијан Мицкоски, претседателот на ВМРО-ДПМНЕ. Заев останува на последната понуда избори на 5 јули, а Мицкоски би попуштил за избори некаде кон крајот на јули.
Се наведува дека ВМРО-ДПМНЕ останува на ставот дека епидемијата од коронавирусот во Македонија не е надмината, дека дневните резултати за новозаразени, излечени и починати лица не покажуваат никаков напредок во однос на надминување на кризата како што тоа здравствените власти сакаат да го прикажат. Избори спротивно на законот и на грбот на здравјето и животот на граѓаните не се опција, велат во ВМРО-ДПМНЕ.
Од партијата предложиле на избори да се оди 15 дена откако резултатите за новозаразени лица со ковид-19 бидат под 10 во низа од 14 дена. ВМРО-ДПМНЕ смета дека дури тогаш ќе може веќе да се зборува за ослабување на епидемијата и за можност од организирање избори. Од партијата велат дека бојкотот на изборите како опција останува ако СДСМ остане на тоа дека треба да се организираат брзи избори и покрај тоа што бројот на новозаразени не опаѓа.
Утре завршува вонредната состојба, Владата треба да му предложи на претседателот на државата дали има потреба од продолжување на вонредната состојба, а овие 2-3 дена се чека и на можна лидерска средба на која со консензус би требало да се реши за датум за избори.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа