Наскоро судење и во Идризово: Во затворот изградена најголемата судница во државата

Изградена е најголемата судница во државата во склоп на затворот „Идризово“, со поддршка на Европската Унија во рамки на ИПА акциската програма „Поддршка на Секторот Правда“. Целиот овој дел од затворот се простира на 1000 м2 и има капацитет за вкупно околу 120 лица.

Прoектот е финансиран во рамки на ИПА Акциската програма „Поддршка на Секторот Правда“, а договорот за изградба на судницата во затворот „Идризово“ е во вредност од еден милион, двесте педесет и седум илјади евра. Наскоро се очекува и опремување на судницата со мебел по што ќе следи и нејзиното официјално отворање и пуштање во употреба.

Оваа судница е изградена по теркот на судниците во државите со големо искуство во справувањето со организираниот криминал.

Судницата е само еден сегмент од целокупниот комплекс за оваа намена кој содржи ќелии за обвинетите, посебни канцеларии за судиите и јавните обвинители, простории за адвокатите, најсовремен систем за заштита на сведоци со можност за изобличување на слика и тон, систем за видео конференција, кабина за преведувачи, како и соодветен безбедносен и мониторинг систем. Овој комплекс располага со посебни влезови за осудени лица, за службени лица, за јавноста која ќе присуствува на овие судења и посебен дел за новинарите.

Имајќи ја во предвид сериозноста на тешките кривични дела и безбедносните причини, соопштија денеска од Министерството за правда, оваа судница со капацитет од околу 120 лица, ќе овозможи судењата на притворените лица за овие случаи да се одвиваат во казнено поправниот дом „Идризово“.

– Целта за изградбата на овој комплекс со судница во затворот „Идризово“ е во неа да им се суди на притворени, како и на осудени лица за тешки кривични дела против кои се водат и други кривични постапки, а чиј транспорт до судовите е безбедносно ризичен, се посочува во соопштението.

Со тоа, се подвлекува, значително ќе се намали ризикот од бегства на притворени и осудени лица за време на транспорт до судовите. Дополнително, со користењето на оваа судница, ќе бидат заштедени значителни средства за транспорт на притворени и осудени лица во судовите, а воедно ќе се растерети и затворската служба и полицијата која учествува во спроводите на овие лица.