Мерклел телефонски разговарала за името со Ципрас пред средбата со Заев

Грчкиот премиер Алексис Ципрас имал телефонски разговор со германската канцеларка Ангела Меркел, а една од темите било и прашањето со името, соопштуваат од кабинетот на Ципрас

„Двајцата лидери разговараа за текот на разговорите за прашањето за името на ПЈРМ, провокативната воздухопловна активност на Турција во Егејското море и евро-турските односи“, се наведува во кусото соопштение од кабинетот на грчкиот премиер, јавува дописникот на МИА од Атина.

Грчката телевизија Скај, повикувајќи се на свои извори, објави дека „Ципрас на Меркел и ја потенцирал потребата за конечно решение во спорот, со промена на уставното име на соседната земја“. Според истите извори, грчкиот премиер и германската канцеларка се договориле да се сретнат во петок во Брисел на неформалниот состанок на лидерите на ЕУ.

Телефонскиот разговор Ципрас – Меркел доаѓа на само еден ден пред посетата на македонскиот премиер Зоран Заев на Берлин и средбата со германската канцеларка.