Изградбата на железничката делница Бељаковце–Крива Паланка претставува „инженерско достигнување“ и доказ дека државата има капацитет за реализација на големи инфраструктурни проекти, напиша вицепремиерот и министер за транспорт Александар Николоски на својот Фејсбук профил.
Тој наведува дека на оваа делница се градат мостови со столбови високи и до 61 метар, кои надминуваат висина на повеќекатни објекти во урбани средини. Во проектот ќе бидат вградени десетици илјади тони челик и околу 125.000 кубни метри бетон.
Николоски истакнува дека не станува збор само за транспортна инфраструктура, туку за проект со пошироко значење.
„Ова не е само железница, туку доказ дека Македонија може да реализира големи и сложени проекти“, посочува тој во објавата.
Железничката делница Бељаковце–Крива Паланка е дел од пругата кон Бугарија, која се гради во рамки на Паневропскиот коридор 8 и вклучува изградба на мостови, тунели и придружна инфраструктура.