Двокатен автобус на ЈСП „Скопје“ од линијата 25 се запали денеска на видиковецот на Водно. Во инцидентот нема повредени.
Директорот на Дирекцијата за заштита и спасување, Стојанче Ангелов, информираше дека скопските пожарникари интервенираат на местото и дека нема опасност огнот да се прошири кон блиската вегетација.
„Во моментов, на видиковецот на Водно има запален двокатен автобус на ЈСП. Скопските пожарникари работат на негово гаснење, очекувам набргу да биде изгаснат. Засега не постои опасност од ширење на огнот кон блиската вегетација“, изјави Ангелов.
Директорот на ЈСП „Скопје“, Саше Илиевски, изјавил дека според првичните информации во автобусот немало патници.
Станува збор за автобус од линијата 25, која сообраќа до Средно Водно.