Пазарот на недвижности во Европската Унија бележи силен раст во третиот квартал од 2025 година. Цените на становите се зголемиле за 5,5 проценти, додека кириите пораснале за 3,1 отсто во споредба со истиот период минатата година.
Според најновите податоци на Евростат, трендот на поскапување продолжува и на квартално ниво. Во однос на вториот квартал од 2025 година, цените на недвижностите се зголемени за 1,6 отсто, а станарините за 0,9 отсто.
Во периодот од 2015 до крајот на 2025 година, цените на становите во ЕУ во просек пораснале за 63,6 проценти, додека закупнините се зголемиле за 21,1 отсто. Додека кириите во последната деценија бележат релативно стабилен раст, кај цените на становите се забележуваат периоди на стагнација, проследени со фази на исклучително брзо поскапување.
Најизразен раст е регистриран во Унгарија, каде цените на становите од 2015 година пораснале за дури 275 проценти. Освен Унгарија, двојно зголемување на цените е забележано во уште 11 земји-членки. На врвот на листата се Португалија, Литванија и Бугарија, со раст од над 150 отсто.
Единствен исклучок е Финска, каде цените на недвижностите денес се за два проценти пониски во споредба со пред десет години. Кога станува збор за кириите, најголем раст повторно е забележан во Унгарија, со скок од 107 отсто, а значителни зголемувања се евидентирани и во Литванија, Словенија, Полска и Ирска.