Народна банка на Северна Македонија одбележува 80 години од институционализираното централнобанкарско работење во земјата. Според банката, овој јубилеј ја потврдува долгорочната, динамична и одговорна институционална еволуција, обележана со континуирани трансформации и прилагодувања на економските и општествените промени.
Темелите на централнобанкарското работење беа поставени со Уредбата за спојување на кредитните претпријатија од државниот сектор на 25 септември 1946 година, со која Македонската стопанска банка стана Централа на Народната банка на ФНРЈ за Народна Република Македонија. Тие беа дополнително зацврстени со фактичкото спојување со Народната банка на ФНРЈ на 19 октомври истата година. Со создавањето на независната држава и прогласувањето на монетарната самостојност во април 1992 година, Народната банка се разви во самостојна институција, носителка на сите клучни функции на современото централно банкарство.
Во изминатите осум децении, банката функционираше во различни општествени и економски услови, од периоди на стабилност до длабоки трансформации. Постепено ги утврди своите надлежности, функции и институционален интегритет, станувајќи современа, професионална и кредибилна централна банка со висок ниво на доверба кај јавноста и препознатлив углед на меѓународната финансиска сцена. Преку доследно спроведување на своите законски цели – одржување на ценовната и финансиската стабилност – банката создава стабилни макроекономски услови и придонесува за одржлив економски раст и развој на општеството.
По повод јубилејот, Народната банка најавува низа активности со кои ќе се истакне богатото институционално наследство и улогата на централното банкарство во современото општество.