Руските официјални претставници во петокот соопштија дека најмалку четири лица го загубиле животот, а 35 деца се повредени при ноќен украински напад со дрон.
Предмет на нападот бил ученички дом во Луганската област, регион во источна Украина кој во моментов се наоѓа под руска контрола.
Британската новинска агенција Ројтерс нагласи дека во овој момент нема можност за независна потврда на настанот на терен.
Официјален Киев, кој води воени операции за враќање на оваа област, сè уште не излегол со свој коментар за случајот.
Инаку, Луганск е една од четирите области кои Русија еднострано ги приспои во 2022 година, во она што Киев го нарече незаконско заземање територија.
Според рускиот комесар за човекови права, Јана Лантратова, во моментот на ударот во зградата на Луганскиот педагошки универзитет во Старобилск спиеле 86 тинејџери на возраст од 14 до 18 години.
„Вооружените сили на Украина извршија целен напад врз децата кои спиеле“, наведе Лантратова во изјавата.
Високиот руски функционер во Луганск, Леонид Пасечник, потврди дека две лица се веќе извлечени од урнатините.
Тој додаде дека спасувачките екипи сè уште се на терен и трагаат по децата кои останале заробени под тешко оштетените згради.
На објавените визуелни материјали од руските власти се гледаат пожари и делумно урнати објекти, како и спасувачи кои евакуираат повредени лица.
По повод нападот реагираа и од Москва, каде портпаролот на Кремљ, Дмитриј Песков, в петок им изјави на новинарите дека одговорните мора да бидат изведени пред лицето на правдата.