Со собрани 684.777 килограми отпад и учество на 70.688 граѓани, над 600 организации, повеќе од 250 државни институции, училишта од целата држава и бројни компании, заврши шестото издание на еко-акцијата „ГЕНЕРАЛКА ВИКЕНД“, која важи за најмасовна еколошка иницијатива во земјава и на Балканот.
Во рамки на годинашното издание, реализирано од 8 до 10 мај, беа спроведени повеќе од 600 акции за чистење и 1.900 едукативни активности „Еко час“ во 81 општина низ државата.
За шест години постоење, иницијативата има мобилизирано над 170.000 граѓани и собрани вкупно 2,2 милиони килограми отпад, прераснувајќи од локална акција во национално движење за заштита на животната средина.
„ГЕНЕРАЛКА ВИКЕНД“ е организирана од „Мен енд Маунтен“, во соработка со повеќе партнери, меѓу кои Пакомак, Нула Отпад, Саубермахер, Пивара Скопје, ЕВН, Шпаркасе банка, ИУТЕ, Макстил, КАЗ Груп, Црвен крст, ЗЕЛС, Министерството за образование и наука, општини, невладини организации и државни институции.
По завршувањето на акцијата, отпадот е собран и соодветно депониран преку локалните комунални претпријатија, додека селектираниот отпад како пластика, лименки и хартија е подигнат од „Пакомак“, а електронскиот отпад од „Нула Отпад“.
Организаторите посочуваат дека најголемата вредност на иницијативата не се само бројките, туку подигнувањето на свеста и заедничкото делување на граѓаните, институциите и компаниите за почиста животна средина.
Во рамки на проектот, во соработка со Министерството за образование и наука и УНИЦЕФ, е имплементирана и образовната програма „Еко час“, преку која десетици илјади ученици стекнале знаења за екологија и циркуларна економија преку практични активности.