Цените на нафтата денеска забележаа остар скок на светските берзи, достигнувајќи го прагот од 102 долари за барел. Ваквиот потрес на пазарите доаѓа по одлуката на САД да воведат поморска блокада на иранските пристаништа, што ги подгреа стравувањата за сериозен дефицит на енергенси од регионот на Персискиот Залив.
На лондонскиот пазар цената на барелот порасна за 6,65 долари и изнесува 101,85 долари, додека на американскиот пазар поскапувањето изнесува 6,07 долари, со што нафтата се тргува по 102,64 долари. Инвеститорите реагираат на колапсот на преговорите во Исламабад и наредбата на американскиот претседател Доналд Трамп за воена интервенција во Ормутскиот теснец.
САД бараат итно и безусловно отворање на теснецот, додека Техеран бара прекин на огнот на сите фронтови. Состојбата дополнително се влоши по заминувањето на американскиот преговарачки тим предводен од потпретседателот Џејмс Дејвид Венс, по што следеше најавата за блокада.
„Американската морнарица ќе ги запре сите бродови што им платиле на иранските власти транзитна такса“, порача Трамп, најавувајќи дека блокадата стапува на сила веднаш.