Скопје денеска е домаќин на деветтото издание на Регионалната конференција за е-трговија, која годинава се одржува под мотото „From Wait to Go: E-commerce at AI Speed!“. На настанот се очекува присуство на повеќе од 900 учесници од над 12 земји, како и повеќе од 30 домашни и странски говорници.
Конференцијата ќе ги обедини претставниците на компаниите, институциите и меѓународните организации, кои ќе разменат искуства и идеи за насоките во кои се движи дигиталната трговија и можностите што ги отвора примената на новите технологии.
Централно место во дискусиите ќе има примената на вештачката интелигенција во онлајн трговијата, промените во навиките на потрошувачите, развојот на дигиталните начини на плаќање, како и потенцијалот за поголема поврзаност и раст на регионалниот пазар, информираат од Асоцијацијата за е-трговија на Македонија.
Меѓу најавените говорници се министерот за дигитална трансформација Стефан Андоновски, претседателката на Асоцијацијата за е-трговија на Македонија, Нина Ангеловска Станков, и амбасадорката на Народна Република Кина во земјава, Џијанг Сјаојан.