Градоначалничката на Општина Неготино, Марија Нацева, на прес-конференција по повод една година од преземањето на функцијата презентираше извештај за реализираните проекти, истакнувајќи дека во фокусот биле инфраструктурата, образованието, спортот и поддршката за семејствата.
Нацева истакна дека Општината реализирала значајни инфраструктурни зафати со средства обезбедени од Владата.
„Имено преку аплицирање со проекти на првиот јавен повик, како Општина ни беа одобрени средства од 80.000.000 денари за 5 проекти кои се веќе реализирани, додека на вториот повик на Општина Неготино и беа одобрени средства од околу 160.000.000 денари за реализација на вкупно 10 проекти, или севкупно Владата во реализација на инфраструктурни проекти во општина Неготино, обезбеди средства од 240.000.000 денари.“
Меѓу клучните проекти таа ги наведе реконструкцијата на улицата „29-ти ноември“, изградбата на новите кружни текови, обновата на главната улица „Маршал Тито“, како и уредувањето на новиот парк „8-ми Ноември“ вреден 13,3 милиони денари. Исто така, беше потенцирано дека по две децении Неготино добило нови функционални семафори.
Во делот на образованието и младите, Нацева потсети дека се обезбедени финансиски средства за првачињата, награди за најуспешните ученици и ментори, бесплатни униформи и оброци, како и подобрени услови во училиштата и градинките. Воедно, беа доделени ваучери за новороденчиња и продолжена поддршката за ранливите категории и спортските клубови.