Министерството за внатрешни работи информира дека воведува кодекс за облекување за сите вработени и странки кои ги посетуваат објектите на Одделот за граѓански работи.
Како што соопштуваат од МВР, целта на кодексот е одржување на професионалниот стандард, дигнитетот на институцијата и меѓусебната почит.
-Како институција која е постојан сервис на граѓаните, веруваме дека соодветното облекување придонесува кон подобра работна атмосфера и почитување на државните институции. Во таа насока, ги замолуваме сите граѓани пред доаѓање во нашите простории за подигнување лични документи, пасоши или други административни услуги да се погрижат нивниот изглед да биде во рамките на општоприфатените норми за јавни институции, информираат од МВР.
Според новите правила, како неприфатлива облека при влез во службените простории се смета премногу кратка и тесна облека, облека што прекумерно открива делови од телото, како и облека наменета за домашна употреба, плажа или ноќни клубови. Исто така, опфатени се и тренерки и спортска облека, облека со навредлива содржина, како и несоодветни обувки како влечки, папучи, кломпи, налани и апостолки.
Од МВР додаваат дека и вработените во Одделот за граѓански работи се должни да го почитуваат утврдениот кодекс за облекување.