Секторот за сообраќајни работи при Министерството за внатрешни работи, вчера, во периодот од 08:00 до 13:00 часот, на територијата на целата држава, спроведе зајакнати акциски контроли над автобуси и други возила со кои се врши јавен превоз на патници.
Во рамки на контролите биле проверени вкупно 405 автобуси и други возила со кои се врши јавен превоз на патници, при што кај 92 возила се констатирани неправилности. Во просек тоа е неправилност на секој 4ти контролиран автобус.
-Во рамки на контролите, на технички преглед биле упатени 170 возила, додека 34 се исклучени од сообраќај поради утврдени неисправности. За сите констатирани прекршоци преземени се соодветни мерки согласно законските прописи. Во текот на контролите поднесени се и три кривични пријави согласно член 297-а од Кривичниот законик, а едно возило е одземено согласно член 300-б. Констатирани се и 239 прекршоци од друг вид, се наведува во соопштението од МВР.
Од МВР најавуваат дека и во наредниот период ќе продолжат со засилени сообраќајни контроли, со цел обезбедување повисоко ниво на безбедност и сигурност при јавниот превоз на патници.