Министерот за надворешни работи и надворешна трговија, Тимчо Муцунски, утре и задутре ќе престојува во работна посета на Вашингтон, на покана на американскиот државен секретар Марко Рубио.
За време на престојот, Муцунски ќе учествува на министерска конференција посветена на заканите од политичкиот тероризам, на која ќе присуствуваат високи претставници од повеќе од 60 држави.
Како што информираат од Министерството за надворешни работи и надворешна трговија, целта на состанокот е унапредување на меѓународната соработка и зајакнување на институционалната подготвеност за справување со современите форми на политички мотивирано насилство и тероризам.
Од МНРиНТ посочуваат дека конференцијата ќе биде можност за продлабочување на соработката со САД и останатите партнери, преку размена на безбедносни информации и координиран пристап кон новите предизвици.
Во фокусот на разговорите ќе бидат транснационалниот карактер на политичкиот тероризам, радикализацијата во дигиталната ера, како и механизмите за превенција и рано препознавање на заканите.
Муцунски ќе ги претстави и активностите на Северна Македонија за спречување на радикализацијата и насилниот екстремизам, како и напорите за унапредување на законската и институционалната рамка.
За време на посетата, предвидена е и средба на маргините на конференцијата со Даниел Џ. Лотон, заменик-помошник државен секретар за Западна и Централна Европа и Јужна Европа во Бирото за европски и евроазиски прашања на Стејт департментот.