Министерот за надворешни работи и надворешна трговија, Тимчо Муцунски, денеска ќе учествува на состанокот на министрите за надворешни работи на Процесот за соработка на Југоисточна Европа (ПСЈИЕ), кој се одржува во Софија во рамки на бугарското претседавање со иницијативата.
Состанокот е посветен на одбележувањето на 30-годишнината од формирањето на ПСЈИЕ и се одржува под мотото: „Заеднички компас за стабилен, безбеден и одржлив регион – 30 години регионална сопственост и европска аспирација“.
Според МНРиНТ, дискусиите ќе се фокусираат на европската перспектива на Југоисточна Европа, унапредување на регионалната соработка, зајакнување на безбедноста и отпорноста на регионот, како и продлабочување на економската интеграција, конкурентноста и поврзаноста во услови на актуелните геополитички предизвици.
ПСЈИЕ претставува највисок политички форум за регионална соработка во Југоисточна Европа и важна платформа за промовирање на добрососедските односи, политичкиот дијалог и европската интеграција на регионот.
На состанокот се очекува усвојување на заедничка декларација со која ќе се потврди посветеноста на учесниците кон мирот, стабилноста, одржливиот развој, регионалната соработка и европската иднина на Југоисточна Европа.