Министерот за надворешни работи и надворешна трговија, Тимчо Муцунски, во рамки на својата работна посета на Сараево, денеска оствари средба со министерот за надворешни работи на Босна и Херцеговина, Елмедин Конаковиќ.
За време на разговорите, двајцата министри ги потврдија одличните билатерални односи меѓу двете држави, кои се карактеризираат со континуирана соработка и конструктивен политички дијалог.
Фокусот на средбата бил ставен на евроинтегративните процеси и регионалната стабилност, што министерот Муцунски го потврди во својата изјава.
„Разговаравме за состојбите во регионот, европската интеграција и политиката на проширување на Европската Унија. Се согласивме дека проширувањето претставува стратешки интерес и за Западен Балкан и за самата Унија, особено во услови на засилени геополитички предизвици“, сподели министерот преку социјалните мрежи.
Дополнително, шефовите на дипломатиите размениле мислења и конкретни идеи за натамошно унапредување на економската соработка. Во тој контекст, како клучни приоритети беа посочени почестото организирање на бизнис-форуми, подобрата транспортна поврзаност, како и иницијативата за повторно воспоставување на директната авиолинија на релација Скопје – Сараево.