Министерот за надворешни работи и надворешна трговија, Тимчо Муцунски, денеска ќе престојува во работна посета на Полска.
Како што соопшти Министерството, посетата се реализира на покана од заменик-претседателот на Владата и министер за надворешни работи на Полска, Радослав Шикорски.
Станува збор за прва билатерална посета на Муцунски на Варшава, при што во фокусот на разговорите ќе бидат унапредување на билатералните односи, со акцент на економската соработка, трговската размена и можностите за нови полски инвестиции. Ќе се разговара и за поддршката од Полска за евроинтегративниот процес на земјава, како и за актуелни регионални, европски и безбедносни теми.
Во рамки на посетата е предвидена тет-а-тет средба меѓу двајцата министри, по што ќе следи пленарна средба на делегациите и заедничка прес-конференција.