Министерот за надворешни работи и надворешна трговија, Тимчо Муцунски, во рамки на својата работна посета на Даблин, оствари средба со претседавачот и членовите на Заедничкиот комитет за прашања поврзани со Европската Унија на двата дома на ирскиот Парламент.
За време на разговорите, првиот човек на македонската дипломатија упати директна благодарност до ирските парламентарци за континуираниот став на нивната држава во однос на евроинтеграциите.
„Изразив благодарност за силната и принципиелна поддршка што Ирска ја дава на политиката на проширување на Европската Унија и на нашиот европски пат“ – информираше Муцунски.
Главна тема на состанокот била актуелната состојба во процесот на евроинтеграција, при што министерот ги претставил приоритетите на новата извршна власт во однос на реформската агенда и усогласувањето со европските стандарди.
„Разговаравме за актуелната состојба во процесот на евроинтеграција, при што ја истакнав посветеноста на Владата на спроведувањето на реформите, особено во областа на владеењето на правото, борбата против корупцијата и јакнењето на институциите“ – стои во официјалниот осврт за средбата.
Муцунски пред членовите на Заедничкиот комитет на ирскиот Парламент ја нагласи важноста од фер и транспарентен пристап во процесот на проширување на Унијата, кој мора да се заснова на објективни критериуми и постигнати резултати.
„Потенцирав дека кредибилен процес на проширување, заснован на заслуги и исполнување на Копенхашките критериуми, е од суштинско значење за зачувување на довербата во Европската Унија и нејзината трансформативна моќ во регионот“ – заклучи министерот.
Двете страни ја потврдија посветеноста за понатамошно продлабочување на билатералната соработка меѓу Македонија и Ирска, како на парламентарно, така и на институционално ниво.