Министерството за правда и Министерството за животна средина и просторно планирање потпишаа Меморандум за разбирање со три француски институции за унапредување на климатската и еколошката правда во земјата.
Документот е официјално потпишан со Експертиза Франција (Expertise France), Француската агенција за развој (AFD) и Амбасадата на Франција во Република Северна Македонија.
Од Министерството за правда информираат дека меморандумот ја воспоставува рамката за спроведување на регионалниот проект „Конвергенција на климатската и еколошката правда“ (CEJ Convergence).
Главната цел на овој проект е да го подобри пристапот до правда и да го зајакне учеството на јавноста во прашања поврзани со животната средина.
Активностите, освен во Македонија, паралелно ќе се спроведуваат и во Албанија и Црна Гора, во согласност со европските стандарди и законодавството на Европската Унија.
Со потпишувањето на документот, домашните институции ја потврдуваат посветеноста на јакнење на владеењето на правото во областа на животната средина.
Проектот во пракса ќе овозможи техничка поддршка, размена на експертиза, организирање обуки и развој на механизми за подобра примена на принципите на еколошката правда.
Во рамките на соработката ќе бидат воспоставени и посебни управни и советодавни тела кои ќе обезбедат координирано и транспарентно спроведување на активностите.
Двете македонски министерства ќе работат заедно со француските институции на унапредување на националните капацитети и приближување на земјата кон европските практики.