Премиерот Христијан Мицкоски денеска изрази сериозно незадоволство од одлуката за стопирање на истрагата за набавка на мазут во ТЕЦ „Неготино“. По увидот во реновираните делови на ГОБ „8-ми Септември“, тој најави дека АД ЕСМ ќе ги искористи сите правни лекови за случајот да биде вратен во процедура.
Мицкоски не го криеше изненадувањето од ваквиот потег на Обвинителството за гонење на организиран криминал и корупција.
„Јас со неверување ја примив таа вест и искрено да кажам бев бев шокиран од тоа што го слушнав. Добро е што АД ЕСМ поранешно ЕЛЕМ најави дека штом ќе ја добие одлуката ќе вложи жалба. Очекувам дека случајот повторно ќе биде вратен на повторно разгледување и повторно анализа“, изјави премиерот.
Според претседателот на Владата, доколку предметот не биде повторно разгледан, тоа ќе значи сериозен удар врз угледот на надлежното обвинителство.
„Ова ОЈО ГОК предводено од Ислам Абази, сме го коментирале, немам што дополнително да кажам. Јавноста знае за каков обвинител станува збор. Ако тоа не се случи, тогаш навистина Обвинителството за гонење на организиран криминал ќе го изгуби својот кредибилитет“, потенцираше Мицкоски.
Тој откри и дека за случајот разговарал со јавниот обвинител Ненад Савески, кој не бил запознаен со одлуката на ОЈО ГОК. Мицкоски заклучи дека очекува по вложената жалба случајот да биде вратен на повторна анализа.