Претседателот на Владата, Христијан Мицкоски, за време на пуштањето во употреба на нов објект, информираше за тековната инвестициска динамика и соработката со локалните самоуправи за реализација на капитални проекти низ земјата.
„Добар ден од мене до сите вас, добар ден до граѓаните. Уште еден од проектите кои се довршуваат и се пуштаат во функција, во употреба. Нормално дека човек не може да не биде задоволен кога ќе направите нешто добро, корисно за заедницата. Гледате дека веќе има и млади луѓе кои што го користат овој објект“, изјави Мицкоски.
Тој посочи дека целта на Владата останува целосно исполнување на преземените обврски и завршување на ветените проекти во претстојниот период.
„Така што еве, јас посакувам уште многу вакви проекти во периодот кој што следи да ги отпочнеме и оние кои што се отпочнати да ги дозавршиме бидејќи сите оние ветувања кои што се давани треба и да се реализираат. Така што во таа насока е и овј проект“, додаде премиерот.
Мицкоски ги презентираше и конкретните финансиски бројки наменети за локалниот развој, кои се реализираат преку повеќе ресорни програми.
„Што се однесува до Владата ние продолжуваме посветено да работиме заедно со општините во насока на завршување на проектите кои што преку две програми во суштина и два повика од Министерството за локална самоуправа беа објавени, некаде околу 350 милиони евра, со се сите оние други проекти кои што министерствата ги финансираат преку други програми, вкупната инвестиција директна, од владата во општините за капитални инвестиции е околу половина милјарада евра“, подвлече премиерот.
На крајот, тој потенцираше дека ова претставува рамка за досегашната рамнотежна активност со општините.
„Од прилика тоа е инвестициската активност којашто оваа влада за овие не цели две години откако е избрана ја реализира заедно во соработка со општините. Така што, во насока ќе продолжиме и во периодот кој што следи“, заклучи Мицкоски.