Премиерот Христијан Мицкоски вечерва упати серија пораки од свечената академија во Охрид по повод Денот на сесловенските просветители, Светите Кирил и Методиј, осврнувајќи се на значењето на писменоста, но и на актуелните политички предизвици.
Во своето обраќање, тој потенцираше дека образованието и духовната зрелост се клучните столбови врз кои почива опстанокот и достоинството на македонскиот народ низ вековите.
„Народ што не ја познава својата писменост и култура, лесно станува туѓ во сопствената историја. Ова не е само историска поука. Ова е и современо предупредување… Образованието е најмоќното оружје со кое можете да го промените светот. Но јас би добал – образованието е и најсилниот штит со кој еден народ ја брани својата иднина. Држава може да изгради патишта, мостови и фабрики. Но ако не создава образовани генерации, таа гради без темели“, истакна Мицкоски.
Шефот на Владата отворено проговори и за дебатите околу употребата на јазиците во образованието и правосудниот систем, подвлекувајќи дека решенијата мора да бидат во рамките на највисокиот правен акт.
„И немам никаква задршка да се разговара на темите за употребата на јазиците. И секоја заедница да го има правото да напредува и да го употребува свойот јазик, сè додека тоа е во рамките на Уставот, законите и сè додека се почитува нашиот идентитетски белег – нашиот македонски јазик“, дециден е премиерот.
Мицкоски испрати и директно предупредување до корумпираните структури и до претставниците на правосудниот систем кои ги одвлекуваат процесите, најавувајќи брза испорака на правдата.
„Ним, и на оној дел од обвинителството кој сè почесто смислува изговори, им велам дека трпението е при крај и дека правдата ќе ги стигне сите. Без оглед на тоа какви изговори слушам, трпението е при крај и јас внимателно следам… Нема да отстапам од тоа да им дишеме во врат на оние кои се богатат и печалат на маката на народот“, порача тој.
На крајот од говорот, премиерот упати повик за сеопшто народно и интелектуално обединување на државата со цел заштита на националните интереси и продолжување на евроинтегративниот пат со сочувано достоинство.