Владата најавува надолна корекција на цените на горивата во земјава со почетокот на новата недела, додека истовремено се очекува и понатамошно стабилизирање на инфлаторните движења. Претседателот на Владата, Христијан Мицкоски, истакна дека извршната власт останува цврсто посветена на мерките за заштита на животниот стандард преку откажување од дел од државните приходи од акцизите и даноците.
Премиерот се осврна на светските берзански движења на нафтените деривати и објасни дека и покрај одредени флуктуации во цената на барелот, македонскиот пазар задржува поволни параметри благодарение на владините интервенции.
Во врска со очекувањата за цените на горивата на пумпите, премиерот Мицкоски изјави:
„Прерано е да зборува, денеска имаме мал скок, вчера цените за „Брентот“ се движеа 83-84 долари за барел, денеска повторно имаме нагорно придвижување, од 87, 88, но далеку под 100. Очекувам веќе в понеделник да имаме надолно нивелирање на цените на бензините и на дизелот. Важно е што како држава остануваме со најевтина цена на дизелот и на безоловниот бензин имајќи предвид дека ова се производи што се купуваат на берза, односно сите држави ги купуваат од исто место. Нема тука голема мудрост во делот кој е поголем или помал претприемач или поголем или помал државник, само што ние како Влада одлучуваме да се откажеме од голем дел од она што некои други држави не го направија, а тоа е акцизи, а се откажавме и од данокот на додадена вредност. Остануваме со таа политика и во периодот што следува очекувам повторно надолно нивелирање на цените – изјави Мицкоски.“
Појаснувајќи ја стратегијата за непречено снабдување на пазарот и избегнување на рестрикциите за извоз кои ги воведоа други земји, премиерот нагласи дека државните политики биле насочени кон поддршка на граѓаните од регионот кои ги користат домашните капацитети.
Во однос на инфлаторните движења и споредбата со кризните периоди, Мицкоски ја презентираше домашната економска состојба:
„Лично правев анализа и ги споредував јуни 2026 со јуни 2022, тоа се две слични години затоа што тогаш (2022) почна војната во Украина, а сега е војната во Иран, во Заливот. Сите светски познавачи велат дека оваа војна има далеку подевастирачки последици за светската економија, особено повеќе како енергетска криза. Ако тогаш сме имале 14,7 проценти инфлација, сега е 3,4 проценти. Ако тогаш прехранбените производи биле над 15 проценти и биле главниот носител, сега тие се со 2,5 проценти. Јас очекувам дополнително стабилизање во јули – рече Мицкоски.“