Премиерот Христијан Мицкоски денеска од Гостивар изјави дека има информации за тоа како запленетата марихуана во Србија излегла од Македонија, директно посочувајќи кон лица поврзани со поранешната власт.Одговарајќи на прозивките од опозицијата, тој откри дека во случајот е вмешана фирма поврзана со поранешен локален функционер на СДСМ.
„Има функционери, но од претходната Влада. Има фирма која што е сопственост на поранешен претседател на СДСМ во Ново Село односно негов син. Можеби МВР може повеќе да сподели, но во интерес на истрагата би се задржал на ова“, изјави Мицкоски за време на увидот на градежните работи на Коридорот 8.
Во меѓувреме, Основното јавно обвинителство за гонење на организиран криминал и корупција (ОЈО ГОКК) информираше дека е отворена истражна постапка против шест лица за неовластено пуштање во промет на наркотични дроги. Истрагата се темели на докази од МВР и од српското Обвинителство преку меѓународна правна помош.
Според ОЈО, осомничените делувале од 2025 година до крајот на јануари 2026 година. Првоосомничениот,сопственик на фирма од Скопје, набавил над 8.832 килограми сув цвет од канабис од струмичка фирма. Откако вработените го спакувале во над 200 кутии, бил организиран повеќекратен транспорт кон Србија.
За двајца од осомничените, кои веќе се наоѓаат во краткотраен притвор, надлежниот јавен обвинител побара од судот да им биде одредена мерка притвор во траење од 30 дена.