Премиерот Христијан Мицкоски тврди дека Македонија во моментов има најниски цени на храна и пијалаци во регионот и дека Владата успеала да ја стави инфлацијата под контрола.
„Ние се наоѓаме како држава со убедливо најниски цени од аспект на пијалаците и храната во регионот, со што паѓаат сите тези на оние кои изминатиот период ширеа лаги и дезинформации“, изјави Мицкоски, посочувајќи дека сите економски проблеми сè уште не се решени.
Според него, во третиот квартал земјата има најниска стапка на инфлација во регионот, а таа е за околу 25 до 30 проценти пониска од просекот во Европската Унија.
„Работевме на консолидирање на инфлацијата и денеска имаме убедливо најниска стапка во регионот, а би рекол можеби и во Европа“, рече премиерот.
Мицкоски упати критики и до опозицијата и дел од синдикатите, обвинувајќи ги дека со, како што рече, лаги и конструкции се обидуваат да ѝ нанесат политичка штета на Владата, а резултатите од изборите во Брвеница ги посочи како потврда дека граѓаните ја поддржуваат власта.