Од 1 септември официјално почнува со работа првата линија од проектот „Градски воз“, која ќе сообраќа од Зелениково до Нова железничка станица Скопје. Официјалната промоција е закажана за 2 септември во 11 часот.
Првата линија ќе сообраќа на релацијата Зелениково – Ново Зелениково – Орешани – Јане Сандански – Драчево – Лисиче – Нова железничка станица Скопје.
За потребите на проектот, Железници Инфраструктура извршила целосна реконструкција на пругата со цел да се зголемат брзината и капацитетот на оваа релација. Сообраќајот ќе се реализира со три возови според утврден возен ред на МЖ Транспорт.
На официјалната промоција во среда се очекува да присуствуваат премиерот Христијан Мицкоски, вицепремиерот и министер за транспорт Александар Николоски, директорите на МЖ Инфраструктура и МЖ Транспорт, како и градоначалниците на Скопје, Зелениково, Кисела Вода и Аеродром.
Предвидено е тие да патуваат со воз од железничката станица Зелениково до Нова железничка станица Скопје.
Од Министерството за транспорт велат дека целта на проектот е подобро поврзување на приградските населби со центарот на Скопје и поефикасен јавен превоз. Предвидена е и интеграција со возниот ред на ЈСП.
Во тек е и проектирањето на втората и третата линија. Едната треба да води од Нова железничка станица преку Бутел и Скопје-Север до Ѓорче Петров, а другата преку Автокоманда и Маџари до Илинден.