Градоначалникот на Општина Сопиште, Јане Мицевски, на денешната прес-конференција по повод една година од преземањето на функцијата презентираше извештај за реализираните проекти во општинарта, нагласувајќи дека фокусот бил ставен на подобрување на инфраструктурата, условите за најмладите и локалниот економски развој.
„Во Сопиште отворивме нова детска градинка „Сонце“, во која 84 дечиња добија безбедно, топло и современо место за згрижување“, истакна Мицевски, додавајќи дека за првпат се обезбедени и бесплатни училишни униформи и ранци за сите првачиња.
Во делот на патната и комуналната инфраструктура, Мицевски посочи дека се реконструирани бројни улици во населените места, меѓу кои улицата 20 во Нова Брезница, улицата 11 во Сопиште, улицата 5 во Добри Дол, како и мостот кој ги поврзува Ракотинци и Добри Дол. Исто така, со поддршка од Владата е рехабилитирана и врската кон Света Петка во должина од речиси 1.700 метри. Општината обезбеди и 10 милиони денари од сопствениот буџет за реконструкција на локални сообраќајници.
Градоначалникот се осврна и на капиталните инвестиции, истакнувајќи го поставувањето на камен-темелникот за првиот трговски центар во општината во вредност од над 5 милиони евра. На крајот, Мицевски порача:
„Не ветувавме за да добиеме доверба. Ветивме за да работиме. А денес, со резултатите, ја оправдуваме довербата.“