Германскиот канцелар Фридрих Мерц остро ја нападна крајно десничарската Алтернатива за Германија, оценувајќи дека нејзиниот концепт за „ремиграција“ во пракса би значел етничко чистење врз основа на потеклото и бојата на кожата.
Во обраќање во Бундестагот, Мерц порача дека луѓето со мигрантско потекло се важен дел од германското општество и економија и дека политиката на АфД директно би ги погодила темелите на државата.
Тој ја обвини партијата и дека ги застапува руските интереси на штета на Германија.
Изјавата доаѓа по победата на АфД на покраинските избори во Саксонија-Анхалт, каде партијата настапи со остри антиимиграциски пораки.
АфД ги отфрла обвинувањата за десен екстремизам и тврди дека ваквите оценки се обид за дискредитација на партијата и нејзините гласачи.