Францускиот претседател Емануел Макрон упати сериозно предупредување до Израел, обвинувајќи ја израелската војска за обиди за „заплашување“ на француските војници кои се дел од мировната мисија на Обединетите нации (УНИФИЛ) во јужен Либан.
По состанокот на францускиот Совет за одбрана, Макрон истакна дека израелските воени операции и присуството на нивните сили на либанска територија не се решение за конфликтот. Тој повика на итен почеток на политички преговори меѓу Израел и Либан за да се спречи натамошна ескалација која веќе однесе над 1.500 животи.
„Нападите и присуството на израелските сили во јужен Либан не претставуваат решение. Ова што го гледаме со израелската окупација не е правилниот одговор на кризата“, порача Макрон.
Дополнително, Париз официјално го обвини Израел за притисок врз „сините шлемови“, нагласувајќи дека безбедноста на меѓународните трупи мора да биде загарантирана. Францускиот претседател потенцираше дека неодамнешното примирје меѓу САД и Иран мора да го опфати и либанскиот фронт, наспроти ставот на Бенјамин Нетанјаху дека воените операции против Хезболах ќе продолжат.