Првенецот на Македонската опера и балет, баритонот Ристе Велков, трагично го загуби својот живот во сообраќајна несреќа, соопштија од неговата матична куќа.
Од таму потенцираат дека македонската оперска сцена изгуби исклучителен уметник, врвен интерпретатор и човек чија уметност остави длабока трага во нашата култура.
Ристе Велков беше еден од водечките и најхаризматичните македонски баритони, роден во 1975 година во Скопје. Поради честите настапи во белканто продукции, тој во јавноста го доби епитетот „италијански баритон со кадифена боја“.
Музичкото образование го започнува во ДМБУЦ „Илија Николовски – Луј“, а дипломира на Факултетот за музичка уметност во Скопје во 1999 година, во класата на професор Милка Ефтимова. Во 2011 година на истиот факултет и магистрира со највисока оцена.
Во текот на кариерата се усовршуваше кај еминентни имиња како Гога Трајанов, Стојан Стојанов Ганчев, Антонио Бојер, Мирела Паруто, Николај Херлеа и Стојан Попов.
Своето деби на сцената го имаше во 1996 година во претставата „Амадеус“ во Драмски театар, додека на „Мајски оперски вечери“ првпат настапи во 1998 година во „Риголето“. Потоа следуваа бројни домашни и меѓународни успеси, вклучувајќи ги и настапите во Јапонија со „Tokyo Opera“.
Зад себе остави повеќе од 15 главни и водечки баритонски улоги меѓу кои се издвојуваат Набуко, Риголето, Магбет, Грофот Луна, Жорж Жермон, Амонасро, Ескамиљо и Валентин.
„Неговата посветеност кон уметноста, впечатливите улоги и љубовта кон сцената ќе останат трајно запаметени. Изразуваме искрено сочувство до неговото семејство, колегите, пријателите и сите што го познаваа и почитуваа. Слава му. Македонска опера и балет“, стои во објавата од институцијата.