Загрепската полиција приведе 25-годишна македонска државјанка под сомнение дека е дел од организирана тричлена група која извршила тешка измама. Како што пренесуваат хрватските медиуми, измамниците успеале да одземат дури 40.000 евра од 87-годишна жена, користејќи добро разработена шема со лажно претставување.
Групата ја контактирала жената по телефон, тврдејќи дека нејзината ќерка е итно хоспитализирана и дека се потребни пари за спасоносна операција. Во измамата, еден од сторителите се претставил како лекар, додека друга женска личност преку телефон глумела дека е ќерката на жртвата за да ја доведе во заблуда.
Осомничената Македонка следниот ден пристигнала со такси возило на адресата на старицата во Загреб, каде ги подигнала парите. Полицијата веќе поднесе кривична пријава против неа, додека по останатите двајца членови на групата, кои исто така се македонски државјани, сè уште интензивно се трага.