Во Европската Унија во 2024 година имало просечно 507 болнички кревети на 100.000 жители, што претставува благо намалување во однос на 2023 година, кога биле регистрирани 511 кревети, покажуваат податоците на Евростат.
Намалувањето на бројот на болнички кревети е тренд што трае од 2009 година, кога во ЕУ имало 582 кревети на 100.000 жители. Според Евростат, причините се поврзуваат со напредокот на науката и технологијата, што доведе до пократко времетраење на болничкиот престој кај многу процедури, како и поголема примена на амбулантско и дневно лекување.
Меѓу земјите членки на ЕУ, најмногу болнички кревети има Бугарија – 870 на 100.000 жители, потоа Германија со 759, Романија со 731, Австрија со 655 и Чешка со 639.
На спротивниот крај се Шведска со 187 болнички кревети на 100.000 жители, Холандија со 221, Данска со 226, Финска со 248, Шпанија со 283 и Ирска со 293.
Кај установите за долготрајна нега, најголем број кревети имаат Холандија со 1.390 на 100.000 жители, Шведска со 1.298 и Белгија со 1.249. Најмалку имаат Грција со 20 и Бугарија со 26 кревети за долготрајна нега на 100.000 жители.
Последните достапни податоци на Евростат за Северна Македонија се од 2021 година, според кои земјата имала 449 болнички кревети и 51 кревет за долготрајна нега на 100.000 жители. Според бројот на болнички кревети, Северна Македонија се наоѓала пред 14 земји членки на ЕУ.