Министерката за енергетика, рударство и минерални суровини, Сања Божиновска, учествуваше на Бизнис форумот Северна Македонија – Турција што се одржа во Истанбул.
Настанот беше посветен на продлабочување на билатералната соработка, привлекување инвестиции и отворање нови можности за партнерства меѓу компаниите и институциите од двете држави.
Форумот ги обедини претставниците на владите, институциите и бизнис-заедниците со цел унапредување на економските односи и зголемување на трговската размена.
На овој економски настан учествуваше висока македонска владина делегација предводена од претседателот на Владата, Христијан Мицкоски.
Во составот на делегацијата беа вклучени и ресорните министри од економската, енергетската и инфраструктурната област.
Во рамки на форумот, министерката Божиновска говореше на панел-дискусијата посветена на билатералната соработка во трговијата, индустријата, производството и синџирите на снабдување.
Таа ги претстави можностите што ги нуди Македонија во секторите енергетика, рударство и минерални суровини пред присутните бизнисмени.
Божиновска ги образложи и реформските процеси кои се насочени кон создавање стабилна, предвидлива и конкурентна инвестициска клима во земјава.
Покрај учеството на панелот, министерката оствари и билатерална средба со министерот за трговија на Република Турција, проф. д-р Омер Болат.
На средбата беше потврдена заедничката заложба за зајакнување на македонско-турските односи и создавање нови можности за одржлив развој.