Македонски државјанин на возраст од 61 година бил уапсен под сомнение за сексуално вознемирување на 15-годишно девојче за време на меѓународен лет со дестинација кон Загреб.
Инцидентот се случил додека малолетничката патувала сама. Во текот на летот, таа дискретно ја повикала стјуардесата и ѝ покажала порака напишана на екранот од нејзиниот мобилен телефон.
„Многу се плашам од овој човек, можете ли некако да ми помогнете?“, гласела пораката со која девојчето побарало помош.
Стјуардесата реагирала брзо и присебно за да не го привлече вниманието на осомничениот. Со цел да ја извлече од ситуацијата, ѝ кажала на патничката дека ќе ѝ ја покаже локацијата на тоалетот.
Наместо во тоалетот, стјуардесата ја одвела малолетничката директно до пилотската кабина, каде што таа ги објаснила сите детали за настанот.
Според нејзината изјава, мажот кој седел до неа почнал непримерно да ја допира уште за време на полетувањето на авионот, оправдувајќи го тоа со изговор дека ѝ помага да го прицврсти безбедносниот појас.
По слетувањето на авионот, полицијата го уапсила 61-годишниот македонски државјанин, а надлежните правосудни и безбедносни органи презеле соодветни мерки за расчистување на случајот.