Левица предлага нова демографска мерка со која државата би преземала дел од преостанатиот станбен кредит на семејствата за секое новородено или посвоено дете, изјави Амар Мециновиќ.
Според предлогот, за секое новородено или посвоено дете државата би отплаќала 20 проценти од преостанатиот износ на станбениот кредит на семејството.
„Ние предвидуваме дека за секое новородено или посвоено дете државата ќе преземе 20 отсто од останатиот станбен кредит во семејството“, рече Мециновиќ.
Тој ја спореди мерката со неодамнешните изјави на министерката за образование Весна Јаневска и порача дека Левица предлага „20 отсто за братче и 20 отсто за сестриче“.
Мециновиќ посочи дека обемот на помошта би зависел од состојбата во семејството и од преостанатиот износ на станбениот кредит.