Министерството за внатрешни работи (МВР) денеска соопшти дека при акциска контрола на возачи на товарни моторни возила ширум територијата на државата се изречени вкупно 37 мерки за сообраќајни прекршоци.
Контролата беше спроведена вчера, во периодот од 9 до 14 часот, од страна на Мобилната единица за безбедност на сообраќајот на патиштата при Сектор за сообраќајни работи, на повеќе подрачја на сектори за внатрешни работи. Акцентот беше ставен на санкционирање на прекршоци од возачи на товарни возила.
Од вкупно 37 казни, 12 се за прекршоци поврзани со претовар на товар, вонреден превоз и некористење на церада, една мерка беше изречена за недостиг на задолжителна опрема во возило, една за техничка неисправност, а 10 за останати сообраќајни прекршоци.
Дополнително, поднесени се 13 барања за поведување прекршочна постапка против правни и одговорни лица, а за сите сторители се изготвени соодветни поднесоци.
Од МВР истакнаа дека сообраќајните контроли ќе продолжат и во наредниот период и апелираат до сите учесници во сообраќајот доследно да ги почитуваат правилата и пропишите. „Само со одговорно однесување можеме заеднички да придонесеме за побезбедни патишта“, порача МВР.