Венко Филипче како прв човек на СДСМ треба да молчи кога станува збор за здравството, изјави на денешната прес-конференција Миле Лефков, член на ИК и пратеник на ВМРО-ДПМНЕ.
Според Лефков, изјавите на Филипче дека обвинителството не покренало обвинение против него не претставуваат доказ за негова невиност, туку покажуваат дека обвинителот Ислам Абази е слеп пред доказите.
„Неговите кажувања дека обвинителството не покренало обвинение против него, покажуваат само дека обвинителот Ислам Абази е слеп пред доказите. Непокренувањето на обвинение е се, само не е доказ дека Филипче е невин. Зошто? Бидејќи од предметот за модуларната во Тетово, се гледа дека Филипче воопшто не го интересирало мислењето на вработените во Министерството за здравство и стручните лица. На вработените им било јасно дека Филипче сторил криминал во случајот со 19 модуларни болници“, изјави Лефков.
Тој посочи дека ниту едно стручно лице не сакало да се потпише на анексот изготвен по пожарот во Тетово, кој според него имал за цел да го спаси тогашниот министер од одговорност.
„Поточно, ова било видливо од фактот што ниту едно стручно лице не сакало да се потпише на анексот на Филипче, изготвен по пожарот во модуларната болница во Тетово, а со цел тој да се спаси од одговорност. Почитувани, сведочиме на низа на пропусти при процедурата и самото поставување на модуларните болници“, додаде пратеникот од ВМРО-ДПМНЕ.
Лефков заклучи дека опозицијата не треба да зборува за грижа за здравството и за граѓаните.
„Воедно, факт е само тоа што Филипче не отстапувал од своја идеја. А сите знаеме дека резултат од тоа се изгорени 14 пациенти во модуларната во Тетово. Затоа талогот од СДС, заедно со првиот човек Филипче можеби е најдобро да не кажуваат дека се грижат за здравството на граѓаните, бидејќи сите сведочиме како завршува нивната грижа, со мртви пациенти“, рече Лефков.